ҰСТАЗДЫҚ ПЕН ӨНЕРДІ ҰШТАСТЫРҒАН

Ұстаздық пен өнерді ұштастырған Жанат Мінайдарұлы Жанкелдин ауданының тумасы. Өнерді бала кезінен жанына серік еткен сегіз қырлы жан. Бүгінгі ұстаздар күні ол үшін де мереке. Өнерде жүрсе де ұстаздықты қатар алып жүр.

– Әкемді алғашқы ұстазым деймін. Әкемнің бауырларының барлығы да өнерге жақын. 7 жасамынан қолға домбыра ұстадым. Мектеп қабырғасында мерекелік іс-шараларға қатысып, атсалысып жүретінмін. Өнерімді әрі қарай ұштаймын деп Қостанай педагокикалық колледжінің музыка бөліміне, домбыра класына түсіп, Нұрбек Тапаловтың шәкірті атандым. Домбырамен ән салу бағытында Азамат Мұқатовтан сабақ алып, сол кісінің бастамасымен «Өмір» триосын құрып, музыка бөлімінің обылыс аймағындағы түрлі кештеріне қатысып, өнерімізді шыңдай түстік.

Кейін оқу бітірген соң өзім білім алған оқу орнына жұмысқа орналасып, одан әрі Қарабалық ауданына кеттім. Ауданның мәдениетін дамытып, өнеріне үлесімізді қостық деп ойлаймын. Себебі біз барған жылдары концерттік бағдармалардың көбі орысша болатын. Одан әрі облыс орталығына ауысып, «Алтын дән» мәдениет үйінде қызмет етудемін. «Тобыл сазы» қазақ ұлт аспаптар оркестірінде домбырашымын. «Шабыт» тобының мүшесімін. Республикалық, обылыстық байқауларға терме орындау бойынша қатысып, жүлделі орындардан көрініп жүрмін. Осынша жыл білгенімді кейінгілерге үйрету мақсатында мектепте сабақ та беремін. Домбыра аспабын таныстырып, үйретіп келемін. Осылайша өнер мен ұстаздықты ұштастырып жүрмін. Ата бабымыздан келе жатқан төл өнерімізді ұрпақтан ұрпаққа жалғау міндетім деп түсінемін. Ұлттық өнеріміздің дамуына жол ашып, көп жұмыстарды атқарып жүрген халық шығармашылығы ұжымына да айтар алғысым шексіз.

Барша ұстаздар қауымын, өмірге жетелеген жандарды кәсіби мерекемен құттықтаймын. Еңбектеріңіздің жемісін көріп, елдің болашағын өркендете беріңіздер.

#ГидПоКазахстану